أسبــاب و مبــررات

ليه بنسأل ديما عن اسباب، اسباب لفرحنا، لزعلنا.. سبب انك تحب حد، معجب بحد، في حاجات من غير اسباب، اهتمام من غير سبب، قرب من غير سبب و ساعات كتير كره من غير سبب، متستنوش اسباب.

 يمكن دا مش الموضوع الاساسي بس دا جزء منه، لغة المبررات لكل حاجه مش مجديه بس كل واحد وليه " كنز"، شيء و فاكر انه أبدي عمره ما هيروح و يسيبه .. فاكر انه هيكمل معاه للنهايه، بس للاسف مفيش حاجه بتفضل للنهايه ممكن متكونش حاسس بقيمته بس اول مايروح بتحس بقيمته على طول، الفكرة انه مبيبقاش فيه سبب معين لحبك للشخص دا ممكن متكنش حاسس انك بتحب الشخص دا قوي كده لانه علي طول جنبك عمرك ماتخيلت انك هتصحي في يوم مش هتلاقيه موجود

الصدمة ساعتها مبتتوصفش اكيد فاكرها و فاكر كل كلمة اتقالتلك.. البقية في حياتك ، يارب تكون اخر الاحزان ، البقاء لله، في الجنة ان شاء الله، جمل كتير بتسمعها و انت بتحاول تستوعب الموقف، هو خلاص راح، مش هنتكلم تاني، مش هتشوفو تاني، مش هيغلس عليك ولا يزعقلك تاني.

بتحس بقدر كبير من الندم   ندم علي كلام كتير كان نفسك تقوله و مقولتوش و انك ازاي كنت بتحب الشخص دا قوي كده ، فبتبدأ تلوم في نفسك علي كل لحظة سكت فيها و متكلمتش، ومقولتلوش انك بتحبه ،مش زعلان منه علي كل مره زعقلك فيها و كان خايف عليك، مقولتلوش ميزعلش منك علي كل مره نزلت فيها مع صحابك و مقعدتش معاه. بتعيش علي أمل انه يحس بيك او يسمعك وانت بتدعيله او يجيلك في المنام يطمنك اه هو بيحس  بيك ف بيجيلك يطمنك هو اكيد بيقولك حاجه لو ركزت هتفهمها.

 بس الدنيا دوارة ، محدش بيموت ناقص عمر و محدش هياخد حاجة معاه .. الكفن مافيهوش جيوب و المعيوب هيموت معيوب. كل دا مقدر و مكتوب ربنا بيختبر صبرك علي الابتلاء، محتاج يشوفك و انت محتاجله و راكع بين ايديه"وقل لن يصيبنا إلا ما كتب الله لنا"، متبكيش .. عارفه صعبه بس البُكي بيعذبه ادعيله و خلي اللي حواليك يدعولوه، اعمل صدقه جاريه، اترحم عليه، وحشك .. وحشك هزاره، ضحكه ،صوته كلها ذكريات .. الموت وحش بس دا قضاء ربنا و مينفعش نعترض عليه هو ديما بيختار الاحسن و الموت علينا حق و كلنا هنموت،انت عايش و بتتنفس و لسه فيك الروح، قول الحمد لله في غيرك مات و كتابه اتقفل، كتابك انت بقي سبت فيه ايه قبل ما تموت؟ طول ما انت قادر تعيش اعمل حاجات نفسك فيها  خلييك سعييد من جواك عشان تسعد اللى حواليك دور جواك كدة على حاجات صغيرة اوى بس قيمتها كبيرة و اعملها. 

طول وقت الحاجات اللي بتبسطك علي قد ما تقدر، وقت الضحك، الأكل، قعدة الاهل و الصحاب،  وقت الكلام مع حد بتحبه .. خلوا وقت كل حاجه حلوه يزيد شويه.

وجودك ديما معايا، عارفه انك شايفني .. بابا وحشتني