اختطفت ابنها ودفعت عشيقها لابتزاز زوجها

   قامت زوجة تدعى عزه سيد عبد الحميد أحمد (21 سنة) ربة منزل وزوجها سيد حسين (24 سنة) عامل وهما فى حالة يرثى لها بتقديم بلاغ ضد اثنين من جيرانهما وهما كل من سيد صلاح الدين السيد شحاته حداد وعلاء حسانين إسماعيل سائق توك توك بخطف نجلهما حسين سيد حسين (3سنوات) وذلك لوجود خلافات سابقة فيما بينهم، امر اللواء عرفه حمزة مدير المباحث بكشف تفاصيل الحادث وتحرير الطفل المختطف والقبض على المتهمين. 

انتقل رجال المباحث الى مكان البلاغ وأمكن ضبط المتهين المبلغ بخطفهما الطفل وبمواجهتهما بما ذكره والدا الطفل أنكرا ما نسب إليهما وانهما لا علاقة لهما بواقعة الخطف وانهما على خلاف مع والد الطفل وعلى خلاف ايضا مع شخص على علاقة غير شرعية بوالدة الطفل ومن خلال السير فى اجراءات الخطة كشفت التحريات السرية كيدية البلاغ.

 توصلت التحريات الي الحقائق و تمت مواجهة الزوجه بما أسفرت عنه التحريات واعترفت بصحتها وأكدت على وجود علاقة محرمة تربطها بصديق زوجها وانها فكرت فى خلق واقعة خطف نجلها مقابل الخصول على المال ونظرا لوجود خلافات مع الجيران قررت ان تتهمه لابتزازه مقابل الحصول على المال وأضافت أنها اتفقت قبل خطف الطفل بأسبوعين مع شخص كان وسيط فى عملية الخطف وهو شاهد الواقعة.

استمعت النيابة الى أقوال الزوج الذى كشف عن تفاصيل مثيرة عندما اكد صحة ماتوصلت اليه تحريات المباحث واضاف أن زوجته اكدت له اثناء عودته من عمله اختفاء نجله وانها لا تعرف اين اختفى او مكانه مما اضطره للابلاغ عن اختفاء نجله لكنه فوجئ بالمباحث تتوصل إلى أن زوجته وراء قصة خطف الطفل وكانت تربطها علاقة محرمة بصديقها وهو مالم يستبعده لانه كان يعلم انها تربطها علاقات بالرجال، وأكد انها اختلقت نفس قصة الخطف،من قبل بالاتفاق مع رجال آخرين وقمت بدفع المال مقابل اعادة نجلى ودون أن أعلم انها وراء تلك الواقعة.

أسبــاب و مبــررات

ليه بنسأل ديما عن اسباب، اسباب لفرحنا، لزعلنا.. سبب انك تحب حد، معجب بحد، في حاجات من غير اسباب، اهتمام من غير سبب، قرب من غير سبب و ساعات كتير كره من غير سبب، متستنوش اسباب.

 يمكن دا مش الموضوع الاساسي بس دا جزء منه، لغة المبررات لكل حاجه مش مجديه بس كل واحد وليه " كنز"، شيء و فاكر انه أبدي عمره ما هيروح و يسيبه .. فاكر انه هيكمل معاه للنهايه، بس للاسف مفيش حاجه بتفضل للنهايه ممكن متكونش حاسس بقيمته بس اول مايروح بتحس بقيمته على طول، الفكرة انه مبيبقاش فيه سبب معين لحبك للشخص دا ممكن متكنش حاسس انك بتحب الشخص دا قوي كده لانه علي طول جنبك عمرك ماتخيلت انك هتصحي في يوم مش هتلاقيه موجود

الصدمة ساعتها مبتتوصفش اكيد فاكرها و فاكر كل كلمة اتقالتلك.. البقية في حياتك ، يارب تكون اخر الاحزان ، البقاء لله، في الجنة ان شاء الله، جمل كتير بتسمعها و انت بتحاول تستوعب الموقف، هو خلاص راح، مش هنتكلم تاني، مش هتشوفو تاني، مش هيغلس عليك ولا يزعقلك تاني.

بتحس بقدر كبير من الندم   ندم علي كلام كتير كان نفسك تقوله و مقولتوش و انك ازاي كنت بتحب الشخص دا قوي كده ، فبتبدأ تلوم في نفسك علي كل لحظة سكت فيها و متكلمتش، ومقولتلوش انك بتحبه ،مش زعلان منه علي كل مره زعقلك فيها و كان خايف عليك، مقولتلوش ميزعلش منك علي كل مره نزلت فيها مع صحابك و مقعدتش معاه. بتعيش علي أمل انه يحس بيك او يسمعك وانت بتدعيله او يجيلك في المنام يطمنك اه هو بيحس  بيك ف بيجيلك يطمنك هو اكيد بيقولك حاجه لو ركزت هتفهمها.

 بس الدنيا دوارة ، محدش بيموت ناقص عمر و محدش هياخد حاجة معاه .. الكفن مافيهوش جيوب و المعيوب هيموت معيوب. كل دا مقدر و مكتوب ربنا بيختبر صبرك علي الابتلاء، محتاج يشوفك و انت محتاجله و راكع بين ايديه"وقل لن يصيبنا إلا ما كتب الله لنا"، متبكيش .. عارفه صعبه بس البُكي بيعذبه ادعيله و خلي اللي حواليك يدعولوه، اعمل صدقه جاريه، اترحم عليه، وحشك .. وحشك هزاره، ضحكه ،صوته كلها ذكريات .. الموت وحش بس دا قضاء ربنا و مينفعش نعترض عليه هو ديما بيختار الاحسن و الموت علينا حق و كلنا هنموت،انت عايش و بتتنفس و لسه فيك الروح، قول الحمد لله في غيرك مات و كتابه اتقفل، كتابك انت بقي سبت فيه ايه قبل ما تموت؟ طول ما انت قادر تعيش اعمل حاجات نفسك فيها  خلييك سعييد من جواك عشان تسعد اللى حواليك دور جواك كدة على حاجات صغيرة اوى بس قيمتها كبيرة و اعملها. 

طول وقت الحاجات اللي بتبسطك علي قد ما تقدر، وقت الضحك، الأكل، قعدة الاهل و الصحاب،  وقت الكلام مع حد بتحبه .. خلوا وقت كل حاجه حلوه يزيد شويه.

وجودك ديما معايا، عارفه انك شايفني .. بابا وحشتني

شوية عيال

اية اللي استفدتوا لما قررت تقتل كلب ، كده انت رضيت نفسك وحسيت انك مرتاح لما عذبت كلب و قتلته لمجرد انه كان بيدافع عن صاحبه اللي للاسف مكنش يستاهل ان حد يدافع عنه .. اي كلب بطبعه لما بتقرب علي صاحبه بيجري عليك و بيحاول يهبشك فالكلب من مبدأ الوفاء لصاحبه اللي رباه جري ورا الاتنين و عضهم و عض واحد كمان مالوش دعوة، مع انه شخص جبان سلم الكلب علشان خاف علي نفسه، حتي الناس بقت جبانة، وقفين يصوروا ويتفرجوا علي الكلب و هو بيتعذب و بيتدبح و محدش فكر يتتدخل و يعترض ولا يمنع وخاف وسكت ممكن يجى يوم واللى اتجراء يدبح كلب يدبحك انت كمان .للأسف مش هنقدر نقول علي العيال بتاعت فيديو كلب الهرم كلاب غلشان حتي الكلاب عندها رحمة. بس اللي دبحوا  الكلب كان ايه اللي ناقصهم فقرا او حاسين بالظلم والقمع؟ ولا دمويين ماعندهمش ذرة انسانية؟ .. عاهرة دخلت الجنة لانها سقت كلبا ..

!أزمة ثقة

عندك كام حد بتثق فيه؟ مش بتثق فيه يعني بتنزل رايح جاي معاه ولا حد بتتصور سيلفي معاه و لا واحد وقت ما تقوله يلا نخرج او ننزل كافيه بتلاقيه و بننزل نقضي وقت لطيف مع بعض و نروَح لأ .. 

بتثق فيه يعني لو انت في مشاكل الدنيا و الأخرة هتلاقيه في ضهرك و هتبقي واثق  إنه  في ضهرك يوم ما هتحكيله حاجه هتبقي عارف إنه لو بيموت مش هيطلعها. ها عندك كام حد بتثق فيه أتنين ، تلاتة ، أربعة ؟ ما هو لو أكتر هتبقي أهبل و بتثق في أي حد بسرعة و ليك حق تاخد علي قفاك.

بس السؤال الأهم هي ليه الثقه ماتت بين الناس؟ ليه اللي عندو منها بيتقال عليه عمله نادرة.مفيش مشكلة تعرف ناس كتير بس المهم تختار اللي تسيبهم يعرفوك بدقه و تديلهم الثقة  لأنك لما تثق هتسلم أسرارك و أنت متطمن مش مدي خوانه لو حصل إيه بينا مش هخاف.

الفكره مش في اللي خان الثقه، الفكرة فى اللى وعد و خلف وعده فى اللى دخل حياتك لخبطها و مشي، كل ده بيخليك تفقد الثقة تدريجيا حتي لما حد بيكدب عليك مره بيبقي صعب تثق فيه تاني حتي لو اعتذرلك مليون مرة و قال انو غلط في حقك، ايه اللي يخليني اصدقوا اللي يكدب مرة هيكدب الف.

 طبعاً الحاجه اللي بقت طبيعية دلوقتي إنك تثق في حد و تخلصله و في الاخر تاخد علي قفاك! وبتاخد الصدمه وتفضل تسأل ازاي؟ طب ليييه يعمل كده و بيجيلك فوبيا من كل اللي حواليك، و تمشي بعد كده بمبدأ التزام الوحده خيرٌ من ألف صديق.

جايز ربنا بيعمل كده عشان يوصلك رسالة ان اللي كانو حواليك ناس مش كويسة عشان تفوق وتبعد، اكيد له حكمة في كده و أكيد هو بيحبك ف هيخترلك الأحسن. خليك عندك ثقة في نفسك عشان لو انت معندكش ثقة في نفسك اللي حواليك هيثقوا فيك ازاي و انت مش مؤمن بنفسك و أوعي تنسي انه كما تدين تدان، إن ربك لبالمرصاد! 

Déja vu

بيحصل انك بتدخل مكان و بتحس انك دخلت المكان دا قبل كده نفس المكان و نفس الاشخاص و التفاصيل نفس الحوار بيتكرر دماغك بتقف عن التفكير لثواني و تبدا انك تحاول تفتكر الموقف دا حصل ازاي دماغك تايهه في حاجات مش بتتوصف بكلام حاجات بتتحس حاجات غريبة .. بس بترجع دماغك فاضيه الموقف دا متكررش في حياتك قبل كده بيبقي نفسك توقف الزمن للحظه و تحكي الموقف للناس اللي حواليك بس الوقت مش هيسعفك لانك تحت تاثيرهذه الظاهرة الغريبة المسماه "بالديجافو" والتي تعني شوهد من قبل .. ظاهرة بتحصل لينا كلنا بس مبتبقاش عارف ايه اللي بيحصل حاسس بخلل، فقدان للزمان و المكان فيه ادراك جيد لكل ما هو ملموس لكن في نفس الوقت حاسس انه ماضي حصل قبل كده، لكن فاقد احساسك بالحاضر.